МУРИЊО БАРА ПОМАЛ СОСТАВ: ТРИ ЅВЕЗДИ МОЖЕ ДА ГО НАПУШТАТ РЕАЛ

Жозе Мурињо полека го составува Реал Мадрид според своите замисли, а по големите инвестиции во нови фудбалери, сега на ред би можеле да дојдат и заминувањата.

Португалскиот стратег јасно порача дека не сака преголем ростер и дека неговата идеја е во текот на сезоната да работи со значително помал број фудбалери.

Сакам мал состав, 20 фудбалери плус оние кои во моментот се повредени.

Во моментов Реал има 26 фудбалери во првиот тим, откако беше донесена одлука и Тиаго Питарч да остане со сениорите. Едер Милитао, Родриго и Ферланд Менди се меѓу играчите кои подолго време се надвор поради повреди, но и покрај тоа, според АС, во составот на Мурињо има тројца фудбалери повеќе од посакуваното.

Како имиња околу кои во моментов има најголема неизвесност се посочуваат Едуардо Камавинга, Ферланд Менди и Раул Асенсио.

Реал ова лето инвестираше огромна сума за реконструкција на тимот. За Диоманде, Кукуреља, Дамфрис, Конате, Бернардо Силва и Карлос Еспи беа потрошени вкупно околу 225 милиони евра.

Голема желба на мадридскиот клуб беше и Родри, но шпанскиот репрезентативец на крајот ја избра Барселона. Поради тоа Реал засега нема намера по секоја цена да носи уште еден играч од средниот ред.

Мурињо има и неколку фудбалери кои можат да покриваат повеќе позиции. Арда Ѓулер и Бернардо Силва можат да играат на различни позиции во средниот ред и нападот, истото важи и за Џуд Белингем, додека во текот на подготовките Дензел Дамфрис беше испробуван и во поофанзивна улога.

Токму поради тоа Португалецот сака пократок ростер во кој секој фудбалер ќе има реална шанса за минутажа.

Најзвучното име меѓу фудбалерите чија иднина не е целосно сигурна е Едуардо Камавинга.

Според АС, Реал би бил подготвен да разгледа сериозна понуда за францускиот репрезентативец. Во моментов нема конкретна понуда, а ниту Камавинга инсистира да замине од клубот.

Интересно е што Мурињо наводно е задоволен од неговиот пристап и од она што го покажал во текот на подготовките. Сепак, доколку пристигне финансиски привлечна понуда од некој од европските гиганти, Реал е подготвен да разговара за трансфер.

Ферланд Менди е уште еден фудбалер за кого Реал би сакал да пронајде решение до крајот на преодниот рок. Мадриѓаните имаат повеќе опции на левата бековска позиција, а Французинот во последните години имаше сериозни проблеми со повредите.

Проблем за Реал е што Менди засега нема намера да го напушти клубот.

Третото име е Раул Асенсио. Младиот стопер верува дека може да се избори за своето место во тимот на Мурињо, но неговата моментална повреда дополнително ја комплицира ситуацијата. Поради проблем со мускулот се очекува да паузира околу шест недели, што би можело да го отежне евентуалниот трансфер.

Од друга страна, Ендрик сигурно останува во Мадрид. Во клубот се разгледувала можноста Бразилецот да замине на позајмица за да добие поголема минутажа, но Мурињо побарал да остане во тимот.

Португалецот сака да има приближно две квалитетни опции за секоја позиција, но не и голем број фудбалери кои би биле незадоволни поради недостиг на минутажа.

Затоа, по летото во кое Реал потроши околу 225 милиони евра за засилувања, последните недели од преодниот рок би можеле да бидат резервирани за продажби. Камавинга, Менди и Асенсио во моментов се трите имиња чија иднина во Мадрид е најнеизвесна.