АРСЕНАЛ КУПУВА НА ГОЛЕМО ВО ГАЛАТАСАРАЈ?

Арсенал и Галатасарај започнале разговори за потенцијален голем трансфер во кој едно од главните имиња е Виктор Осимен, објавува Телеграф.

Контактите меѓу двата клуба првично биле поврзани со интересот на Галатасарај за Габриел Мартинели и Итан Нванери. Турскиот клуб веќе доставил понуда од 38,4 милиони фунти за Мартинели, а истовремено покажал интерес и за Нванери, кој вториот дел од минатата сезона го помина на позајмица во Марсеј.

Сепак, разговорите со спортскиот директор на Арсенал, Андреа Берта, добиле значително поинтересна насока откако во нив било споменато името на Осимен.

Засега не е познато дали Арсенал прв ја отворил можноста за трансфер на нигерискиот напаѓач или Галатасарај го понудил како дел од пошироките преговори меѓу клубовите.

Арсенал веќе подолго време го следи Осимен и го разгледува како една од опциите за засилување на нападот. Сепак, прва желба на лондонскиот клуб останува Хулијан Алварез.

Проблем за Арсенал е што Атлетико Мадрид бара повеќе од 100 милиони фунти за аргентинскиот напаѓач, а самиот Алварез преферира трансфер во Барселона. Поради тоа, клубот од Лондон почнал посериозно да ги разгледува алтернативите, а Осимен повторно се нашол високо на листата.

Нигериецот зад себе има уште една одлична сезона. За Галатасарај постигна 22 гола и запиша осум асистенции, помагајќи му на клубот да стигне до шампионската титула.

Претходно блескаше и во Наполи, со кој ја освои Серија А и беше еден од најзаслужните што клубот по пауза од 33 години повторно стана шампион на Италија.

Осимен со својата физичка сила, брзина и игра во воздух би му понудил на Микел Артета класична опција на позицијата централен напаѓач, а во Арсенал веруваат дека би можел веднаш да направи разлика во Премиер лигата.

Сепак, Арсенал можеби нема да биде единствениот англиски клуб во трката. Тотенхем исто така се поврзува со Осимен, бидејќи бара дополнително засилување во нападот.

Доколку трансферот на Алварез остане недостижен, разговорите со Галатасарај би можеле да го претворат Осимен од алтернативна опција во една од главните трансфер цели на Арсенал до крајот на летниот преоден рок.