ГРЦИТЕ НАЈАВУВААТ СПЕКТАКУЛАРЕН ТРАНСФЕР: БОГДАНОВИЌ ДОАЃА ВО АТИНА?

Грчките медиуми најавуваат можен трансфер кој би можел сериозно да ја размрда европската кошаркарска сцена.

Според информациите на Спорт 24, веднаш по официјализирањето на соработката со Панатинаикос, легендарниот тренер Жељко Обрадовиќ стапил во контакт со капитенот на српската репрезентација Богдан Богдановиќ.

Наводно, во разговорот Богдановиќ му открил на трофејниот стратег дека според моменталната ситуација ова лето би можел да стане слободен играч.

Сепак, српскиот кошаркар не брза со конечната одлука. Според истите извори, тој му порачал на Обрадовиќ дека сака да почека до средината на јули, кога ќе има многу појасна слика за својата иднина во НБА лигата.

Во последните денови се појавија информации дека сериозен интерес за негов ангажман покажуваат и Денвер Нагетс, па затоа Богдановиќ прво сака да ги разгледа сите опции пред да донесе конечна одлука.

Обрадовиќ и Богдановиќ веќе имаат успешно заедничко минато. Двајцата соработуваа во Фенербахче во периодот од 2014 до 2017 година, кога турскиот клуб ја освои и титулата во Евролигата.

Токму поради таа успешна приказна, многумина веруваат дека искусниот тренер би сакал повторно да го има Богдановиќ во својот тим.

Засега нема официјална потврда за евентуални преговори, но доколку Богдановиќ навистина стане слободен играч, Панатинаикос сигурно ќе биде меѓу клубовите кои ќе се обидат да го доведат.

Сепак, конечниот развој на настаните најверојатно ќе зависи од тоа дали српскиот репрезентативец ќе добие астрономска понуда од НБА или ќе одлучи да се врати на европската сцена како едно од најголемите засилувања во последните години.