ЈАНИС ПРЕД ТРЕЈД ВО ГОЛДЕН СТЕЈТ

Трансфер-сагата околу Јанис Адетокумбо добива нова димензија. Според најновиот извештај на ClutchPoints, раководството на Милвоки Бакс покажува сериозен интерес за богатата понуда што ја испратиле Голден Стејт Вориорс.

Наводно, Вориорс се подготвени да понудат „сè освен Стефен Кари“, вклучувајќи четири пика од првата рунда, еден пик од втората рунда и неколку млади играчи. Генералниот менаџер на Бакс, Џон Хорст, и клупската управа биле „фасцинирани“ од можноста да ги добијат пиковите на Голден Стејт, но засега не донеле конечна одлука.

Според шпекулациите, потенцијалниот договор би можел да вклучува имиња како Дрејмонд Грин, Џонатан Куминга, Мозес Муди и Брендин Подземски, заедно со повеќе драфт-пикови. Од друга страна, Вориорс би го добиле Јанис, како и Танасис Адетокумбо.

Сепак, лигата е поделена околу тоа дали Адетокумбо навистина ќе биде трејдуван пред крајниот рок. Јанис има договор до сезоната 2026/27 (со играчка опција за 2027/28), што му дава простор на Милвоки да почека до летото, кога би можеле да добијат уште подобри понуди.

Едно е сигурно, ако Јанис навистина се најде на пазарот, Голден Стејт е меѓу тимовите со најреални шанси да го доведе двократниот МВП.