НЕВИДЛИВИОТ НЕПРИЈАТЕЛ НА АНГЛИЈА: ЕВЕ ЗОШТО АЦТЕКА Е НОЌЕН КОШМАР ЗА ГОСТИТЕ

Англија се пласираше во осминафиналето на Светското првенство со победата над Конго, но во дуелот против Мексико ќе ја очекува уште еден сериозен предизвик: условите на легендарниот стадион Ацтека.

Натпреварот ќе се игра на 2.240 метри надморска височина, каде што разредениот воздух и помалата количина кислород можат значително да влијаат врз физичката подготвеност на фудбалерите. За Англичаните тоа ќе биде прв настап на Ацтека уште од четвртфиналето на Светското првенство во 1986 година против Аргентина.

На оваа височина организмот побрзо се заморува, срцето работи со поголем интензитет, дишењето е потешко, а закрепнувањето меѓу спринтовите трае подолго.

Во меѓувреме, Мексико има огромна предност. Репрезентацијата е навикната на вакви услови, а статистиката на Ацтека е импресивна: 70 победи, 17 нерешени и само два порази на 89 натпревари, додека на Светските првенства таму сè уште нема пораз. Долгата приказна, кратко раскажана можеби најдобро ја опиша поранешниот капитен на Мексико, Павел Пардо:

Кога ќе дојдете тука како противник, знаете дека ќе страдате.

Истото го потврдува и поранешниот англиски репрезентативец Најџел Рiо-Кокер, кој настапуваше на Ацтека во финалето на КОНКАКАФ Лигата на шампионите во 2015 година за Монтреал.

Тоа е најтешкото место на кое сум играл фудбал. Ниту напредокот на спортската наука не може целосно да го елиминира ефектот од надморската височина. Тоа едноставно се чувствува во секој спринт и во секое вдишување.

Британскиот спортски научник Барни Вејнрајт објаснува дека на ваква надморска височина заморот се зголемува за 15 до 20 проценти, играчите можат да истрчаат помала дистанца, а поради недостатокот на кислород се намалува и способноста за брзо носење одлуки во најинтензивните моменти од натпреварот.

Играчите создаваат млечна киселина многу побрзо, што доведува до поголем замор и ги забавува. Максималната брзина при спринт нема значително да се намали, но ќе им треба многу повеќе време за да закрепнат пред следниот интензивен напор. Освен тоа, и мозокот има потреба од кислород за правилно да носи одлуки, па недостатокот може да влијае и врз концентрацијата и реакциите.

Why altitude will hit England so hard vs Mexico as 2,240m-high Azteca to cause debilitating symptoms and breathlessnesshttps://t.co/cfTNauantv

— The Sun Football ⚽ (@TheSunFootball) July 3, 2026

Токму затоа, покрај мотивираниот домаќин, Англија во борбата за четвртфинале ќе мора да се справи и со еден невидлив противник: надморската височина на Ацтека, која со децении претставува една од најголемите предности на мексиканската репрезентација.