МБАПЕ ЗА „ЗЛАТНАТА ТОПКА“: ПОДОБРО ДА ЗАГУБИШ ОД НЕКОЈ ШТО ГО ПОЧИТУВАШ, ОТКОЛКУ ДА ТИ ЈА ДАДАТ ОД СОЖАЛУВАЊЕ

Килијан Мбапе не го крие разочарувањето по освојувањето на второто место во изборот за „Златната топка“. Француската ѕвезда на Реал Мадрид му честиташе на победникот Хари Кејн, но јасно порача дека неговата амбиција е еден ден да го освои престижното признание.

Кејн ја доби наградата по извонредната сезона со 73 гола за Баерн Минхен и англиската репрезентација. Мбапе заврши зад него, а пред Ламин Јамал, кој го зазеде третото место.

„Седев во текот на целата церемонија и слушав сè. Сакав да видам дали ќе нè повикаат на сцената или едноставно сите награди ќе им ги доделат на шпанските фудбалери. Секојпат кога ќе го прогласеа победникот, имав чувство дека уште еден Шпанец ќе го подигне трофејот“, изјави Мбапе.

И покрај разочарувањето, напаѓачот на Реал имаше пофални зборови за Кејн, истакнувајќи ја неговата посветеност и континуитетот на највисоко ниво.

„Хари го претставува она што навистина го ценам во фудбалот. Со години работи напорно, се справува со огромни очекувања и, и покрај притисокот, продолжува да игра на највисоко ниво. Мило ми беше што го видов како го подигнува трофејот. Бев горд на него“, рече Французинот.

Сепак, Мбапе веднаш стави до знаење дека на церемонијата не присуствувал само за да му честита на англискиот голгетер.

„Да бидам јасен, не дојдов на церемонијата за да го поддржам Кејн. Дојдов затоа што и самиот сакав да ја освојам „Златната топка““, нагласи тој.

Мбапе призна дека може да го почитува успехот на друг фудбалер, а истовремено да биде незадоволен од сопствениот резултат.

„Можете да почитувате друг играч, да му честитате и да го цените неговиот успех, а истовремено да бидете разочарани што не сте победиле вие. Секако дека сум благодарен што бев номиниран. Но, не стигнав до ова ниво така што се задоволував со номинации“, порача напаѓачот.

Тој најави дека нема да бара оправдувања, ниту сожалување, туку ќе продолжи да работи за да ја оствари својата цел.

„Повеќе би сакал да ја загубам „Златната топка“ од играч што го почитувам, отколку по церемонијата од сожалување да ми кажуваат дека сум ја заслужил. Хари ја имаше својата вечер и го почитувам тоа. Но, мојата приказна сè уште не е завршена.

Ако треба да работам повеќе, да постигнувам повеќе голови, да ја подобрам играта и да преземам уште поголема одговорност, ќе го направам тоа. Нема да барам никој да ме жали и нема да се жалам на резултатот. Ќе се вратам на работа.

Сакам на церемонијата за „Златната топка“ да го слушнам сопственото име и никој да не дискутира дали сум ја заслужил наградата“, порача Мбапе.