ГАВИ НЕ Е СРЕЌЕН НА „КАМП НОУ“ И САКА ДА СИ ЗАМИНЕ ВО ЈАНУАРИ

Барселона може да остане без една од своите најголеми млади ѕвезди уште во јануари. Гави е незадоволен од статусот во тимот на Ханси Флик, кој според шпанските медиуми повеќе не смета сериозно на неговите услуги.

Ситуацијата на „Камп Ноу“ станува сè понеизвесна, а разделбата во зимскиот преоден рок е сè пореална опција.

Флик неодамна зборуваше за позицијата на шпанскиот играч за врска, оставајќи впечаток дека неговите можности за настап се ограничени.

„Не гледам можност тој да игра како десен бек. Сите знаеме дека е врвен фудбалер и секогаш е опција. Сепак, кога ќе започне натпреварот, таа опција може да исчезне. Разговарав со него за неговата улога и му упатив зборови на поддршка“, изјави тренерот на Барселона.

Бројките ја потврдуваат тешката ситуација на 22-годишниот фудбалер. Во досегашниот дел од сезоната има седум настапи, но вкупно само 191 минута на теренот, што е далеку од очекувањата на играч со неговиот статус.

Гави е производ на младинската школа на Барселона, во која пристигна од Бетис на 11-годишна возраст. За првиот тим досега одигра 173 натпревари, постигна 10 голови и забележа 18 асистенции.

Како најсериозен кандидат за неговиот потпис се споменува Пари Сен Жермен. Луис Енрике би сакал да го доведе во Париз, но интересот за шпанскиот репрезентативец би можел да го привлече и други европски гиганти.

Дополнителна можност за заинтересираните клубови е неговата пазарна вредност, која според последните процени паднала на околу 25 милиони евра. Така, Барселона би можела да се соочи со неочекувано заминување на фудбалер кој со години важеше за еден од столбовите на иднината на клубот.