ПРЕСЕДАНОТ НА ФИФА И СЕ УДРИ ОД ГЛАВА: СЕГА СИТЕ БАРААТ ПОМИЛУВАЊЕ

Одлуката на ФИФА да ја одложи суспензијата на американскиот репрезентативец Фоларин Балогун предизвика вистинска лавина од реакции, а сега истиот третман го бара и Англија.

Англискиот фудбалски сојуз размислува да поднесе барање за укинување на автоматската суспензија на Џарел Кванса, кој доби директен црвен картон во победата над Мексико (3:2) во осминафиналето.

Кванса беше исклучен во 54. минута по остар старт, а му се заканува суспензија од најмалку еден, па дури и два натпревари.

Во меѓувреме, во случајот се вклучија и британски политичари. Пратениците Ноа Лоу и Мелани Он испратија писма до претседателот на ФИФА, Џани Инфантино, барајќи суспензијата на Кванса да биде условно одложена, токму како што беше направено со Балогун.

Тие сметаат дека одлуката на ФИФА во случајот со американскиот напаѓач создала преседан кој мора да важи за сите репрезентации.

Во меѓувреме, британските медиуми пишуваат дека Англискиот фудбалски сојуз ги разгледува сите правни можности, додека Би-Би-Си објави дека токму одлуката за Балогун е главната причина поради која Англичаните веруваат дека имаат основа за жалба.

Хаосот тука не завршува. Според The Athletic и Францускиот фудбалски сојуз размислува да поднесе жалба за жолтиот картон на Михаел Олисе, повикувајќи се на истиот принцип на еднаков третман.

Одлуката на ФИФА за Балогун, донесена по разговорот меѓу американскиот претседател Доналд Трамп и Џани Инфантино, веќе предизвика силни критики од бројни федерации, поранешни фудбалери и од УЕФА.

Наместо да го затвори случајот, ФИФА отвори нов фронт, сега сè повеќе репрезентации бараат исти правила да важат и за нив, што дополнително ја става светската куќа на фудбалот под огромен притисок.