ПЕРЕЗ САКА РЕВИЗИЈА НА ИСТОРИЈАТА: БАРСЕЛОНА МОЖЕ ДА ОСТАНЕ БЕЗ ДЕСЕТИЦИ ТРОФЕИ

Ново поглавје во долгогодишната војна меѓу Реал Мадрид и Барселона би можело да ја потресе европската фудбалска сцена. Според шпанските медиуми, претседателот на Реал Мадрид, Флорентино Перез, подготвува нова правна офанзива против својот најголем ривал поради аферата „Негреира“, случај кој веќе со години предизвикува жестоки дебати во шпанската јавност.

Станува збор за истрагата поврзана со исплатите што Барселона ги вршела кон компании поврзани со поранешниот потпретседател на Техничкиот комитет на судии, Хосе Марија Енрикез Негреира. Според досегашните информации, каталонскиот клуб во периодот од 2001 до 2018 година исплатил околу 8,4 милиони евра за извештаи, анализи и консултантски услуги поврзани со судењето.

Иако досега не е докажано дека овие исплати директно влијаеле врз резултатите на натпреварите, случајот и натаму е предмет на истрага. Барселона постојано тврди дека услугите биле легални и дека немало никаква намера за влијание врз судиските одлуки.

Сепак, во Мадрид сметаат дека приказната е далеку од завршена. Според новинарот Хосе Феликс Дијаз, Флорентино Перез подготвил обемно досие од околу 500 страници кое треба да биде испратено до УЕФА. Целта е европската куќа на фудбалот повторно да го разгледа случајот и да размисли за евентуални санкции против Барселона.

Според истите информации, Реал Мадрид бара најстроги можни мерки, вклучувајќи одземање на освоени титули и потенцијално исфрлање на каталонскиот клуб од европските натпреварувања. Доколку вакво сценарио некогаш стане реалност, последиците би биле огромни не само за Барселона, туку и за целиот европски фудбал.

Во периодот што е опфатен со истрагата, Барселона освои бројни трофеи, меѓу кои и четири титули во Лигата на шампионите, осум шампионски титули во Шпанија и неколку европски и домашни купови. Затоа евентуалната ревизија на тие успеси би можела да отвори безброј правни и спортски прашања.

Од УЕФА засега нема официјална реакција освен ставот дека внимателно ја следи ситуацијата и ги чека конечните исходи од постапките во Шпанија. Сепак, европската федерација има право да реагира независно од домашните судови доколку процени дека е нарушен интегритетот на натпреварувањата.

Во Барселона, пак, остануваат уверени дека нема основа за вакви барања и најавуваат дека ќе ги искористат сите правни механизми за одбрана на клубот доколку дојде до евентуална постапка пред УЕФА.

Додека случајот „Негреира“ продолжува да ја дели шпанската јавност, јасно е дека ривалството меѓу Реал Мадрид и Барселона одамна се пресели и надвор од фудбалските терени. Следните месеци би можеле да донесат нови пресврти во една од најконтроверзните афери во историјата на шпанскиот фудбал.