ВИДАЛ: ПОРАДИ РЕАЛ МАДРИД СЕ ВОВЕДЕ ВАР

Поранешниот фудбалер на Барселона и Баерн Минхен, Артуро Видал, повторно ја отвори старата рана со Реал Мадрид и излезе со сериозни обвинувања кои веќе предизвикуваат реакции во фудбалската јавност.

Во гостување на подкаст, чилеанскиот ветеран без двоумење изјави дека се чувствувал „ограбен“ во дуелите против мадридскиот клуб во Лигата на шампионите, особено во периодот кога настапуваше за Баерн.

Да, се чувствував ограбен од Реал Мадрид. Во два натпревари со Баерн, кога нè елиминираа.

Но тука не застана. Тој отиде чекор понатаму и директно ја поврза технологијата ВАР со наводната судиска наклонетост кон кралевите.

ВАР беше воведен поради Реал Мадрид. Пред тоа имаше премногу измами. Затоа го измислија ВАР – за да не може повеќе да се краде.

Причината на оваа нетрпеливост лежи во четвртфиналето од Лигата на шампионите 2016/17, кога Баерн беше елиминиран на Сантијаго Бернабеу.

Видал тогаш доби црвен картон по втор жолт, во ситуација која многумина ја сметаа за спорна, по дуел со Марко Асенсио. Натпреварот заврши со победа на Реал по продолженија, а Кристијано Роналдо беше клучниот човек. По мечот, Видал жестоко го нападна судењето:

Кога Реал се исплаши, судијата почна со своето шоу. Ова не смее да се случува во Лигата на шампионите.

Изјавите на Видал доаѓаат во момент кога Реал Мадрид повторно е под лупа поради судиски одлуки. По поразот со Гетафе, вниманието беше насочено кон Антонио Рудигер, кој избегна санкција по еден груб старт. Играчот на Гетафе, Диего Рико, јавно реагираше:

Ако беше обратно, јас ќе добиев суспензија од 10 натпревари. Не знам за што служи ВАР.

Тој дури го нарече потегот „напад“, тврдејќи дека Рудигер намерно сакал да го удри.