ДЕНВЕР СЕ РАСПАДНА ПРЕД ПЛЕЈОФОТ: ОТКАЗИТЕ НА ТРЕНЕРОТ МЕЛОУН И МЕНАЏЕРОТ БУТ ГИ ЗАПАЛИЈА ШПЕКУЛАЦИИТЕ ОКОЛУ ЈОКИЌ

Сосема неочекувано вчеравечер (според наше време), Денвер Нагетс му врачи отказ на тренерот Мајк Мелоун, стратегот кој помина една деценија на клупата на франшизата од Колорадо и освои една титула во НБА. Набрзо потоа, разрешен беше и генералниот менаџер Калвин Бут, а овој распад се случи во најлош можен момент ако се знае дека наскоро почнува плејоф-фазата.

Според повеќе американски медиуми, Јокиќ бил информиран дека Мелоун и Бут ќе бидат отпуштени, па до крајот на сезоната Дејвид Аделмен, довчерашниот помошник на Мелоун, ќе ја предводи екипата на Нагетс.

Овие промени во стручниот штаб и раководството експресно ги запалија шпекулациите околу иднината на Никола Јокиќ. Несомнено најдобриот кошаркар во светов моментално неколкупати сезонава покажа незадоволство и се сомневаше во залагањето на неговите соиграчи, особено на одбранбен план.

Веќе се предвидува следната дестинација на популарниот Џокер, и лесно може да се претпостави дека станува збор на Лос Анџелес Лејкерс, втората најтрофејна франшиза. Откако Езерџиите претходно годинава го шокираа светот со трејдот на Лука Дончиќ, наводно планот е да се создаде балканско дуо со Србинот и Словенецот за нови шампионски подвизи на екипата од Калифорнија.