АМАТЕРСКИ КЛУБ ОСВОИ МИЛИОН ФУНТИ НА ЛОТО, ЦЕЛИ 32 ГОДИНИ ЈА ИГРАЛЕ ИСТАТА КОМБИНАЦИЈА

Фудбалскиот клуб Лонглевенс АФ стана сензација во Англија, но не поради резултатите кои ги има туку поради еден неверојатен феномен. Клубот кој доаѓа од Глостер, освои еден милион фунти на Националната лотарија на Обединетото Кралство, откако повеќе од три децении играле со истата низа броеви. Тикетот го купил 73-годишниот претседател на клубот, Бил Дејвис, кој е поврзан со Лонглевенс АФ повеќе од половина век.

Комбинацијата првично била составена од шест члена на клупскиот одбор при почетокот на работата на Националната лотарија, при што секој од нив избрал по еден број. Дејвис продолжил да ја игра истата низа на секое извлекување, а таа сега донела добивка што би можела да ја трансформира иднината на клубот.

„Ова е победа за Лонглевенс“, изјави Дејвис, нагласувајќи дека не го купил тикетот за себе, туку како претставник на клубот. Лонглевенс се натпреварува во Премиер дивизијата на Хеленската лига (Hellenic League), која претставува деветто ниво во англиската фудбалска пирамида.

Клубот сè уште одлучува како да ги искористи парите. Меѓу опциите е купување на објектите што моментално ги изнајмуваат, а управата има намера да ја инвестира добивката на начин што ќе му користи на целиот клуб, вклучувајќи ги и бројните сениорски, женски и младински екипи. Целта е да се обезбеди стабилна иднина, наместо само да се зајакне првиот тим.

Ваква добивка на фудбалски клуб никогаш претходно не се случила во 32-годишната историја на Националната лотарија на Обединетото Кралство.