РАКОМЕТАРИТЕ ПОРАЗЕНИ ОД ГРЦИЈА

Македонските ракометари се враќаат со празни раце од Халкида, каде што загубија од Грција со 29-24 во второто коло од квалификациите за Европското првенство во 2028 година. Избраниците на Кирил Лазаров имаа премногу слабости во играта, особено во нападот, па домашната селекција заслужено стигна до победата.

Грција уште во првото полувреме ја најави својата доминација, користејќи го секој пад во играта на Македонија. Иако нашата селекција поведе со 1-2, следуваше целосен застој во нападот, во кој девет минути не успеа да постигне погодок. Тоа им овозможи на домаќините да направат серија и да поведат со 5-2.

Македонија накратко се доближи на 5-4, но не успеа да го задржи ритамот. Во 21. минута Грција веќе имаше предност од пет гола (10-5), а до крајот на полувремето разликата дополнително порасна. Не помогна ниту тајмаутот на Лазаров, ниту обидите на Кузмановски од седум метри, па на одмор се замина со 16-9.

Во продолжението домашните стигнаа и до најубедливи плус девет (19-10), по што Македонија конечно заигра поангажирано. Костески беше најрасположен во тие моменти, реализираше три седмерци и постигна уште еден гол од крило, помагајќи негативата да се намали на 21-16.

Но, наместо целосно враќање во неизвесноста, следуваше нов удар за македонскиот тим. Петар Атанасијевиќ заработи директен црвен картон, а ниту играта со седум ракометари во нападот не донесе посакуван ефект. Девет минути пред крајот Грција повторно имаше убедливи 27-19 и рутински го приведе мечот до конечните 29-24.

Костески го заврши натпреварот со осум гола, сите во второто полувреме, а Филип Кузмановски беше втор стрелец со седум погодоци. Велковски постигна два гола, додека Мартин Томовски запиша десет одбрани.

Реваншот ќе се игра на 9 мај следната година во Скопје, каде што Македонија ќе има можност да му се реваншира на соседот. Сепак, поразот во Халкида е сериозен сигнал дека ќе биде потребна многу подобра игра во продолжението од квалификациите, но и на претстојниот Мундијал.