ИСТОРИЈАТА СЕ ПОВТОРУВА? ЕВЕ КОГА СВЕТСКОТО ПРВЕНСТВО БЕШЕ БОЈКОТИРАНО

Заканата на УЕФА за можен бојкот на идните Светски првенства поради спорот со ФИФА околу комерцијалните права е преседан за европскиот фудбал, но бојкотите на Мундијалот не се новост во историјата.

Првиот голем пример датира од 1934 година, кога Уругвај одби да ја брани светската титула во знак на протест затоа што голем дел од европските репрезентации не отпатуваа на првото Светско првенство во 1930 година. Четири години подоцна, Уругвај и Аргентина го бојкотираа Мундијалот бидејќи очекуваа токму тие да бидат домаќини.

Во квалификациите за Светското првенство во 1958 година, Турција, Индонезија, Египет и Судан одбија да играат против Израел од политички причини, па Велс доби дополнителен бараж и избори пласман на завршниот турнир.

Во 1964 година, сите 15 африкански репрезентации се повлекоа од квалификациите, протестирајќи против распределбата на местата за Светското првенство, бидејќи Африка, Азија и Океанија делеа само едно место.

Осум години подоцна, Советскиот Сојуз одби да гостува во Чиле во баражот за СП по државниот удар во таа земја. Натпреварот формално беше одигран без противник, а Чиле доби службена победа и се пласираше на Мундијалот.

И оваа година имаше повици за бојкот на Светското првенство, поврзани со конфликтот меѓу Иран, САД и Израел, како и со американската имиграциска политика.

Доколку УЕФА навистина се одлучи на бојкот на натпреварувањата на ФИФА, тоа би бил еден од најголемите потреси во историјата на светскиот фудбал, но не и прв случај политиката и несогласувањата меѓу федерациите да влијаат врз Светското првенство.