ПАНИКА ВО УРУГВАЈ: ПОМАЛКУ ОД 24 ЧАСА ДО МЕЧОТ, А ТИМОТ СÈ УШТЕ НЕ Е НА СП

Уругвајската репрезентација се најде во неочекуван проблем непосредно пред стартот на Светското првенство, откако американските воздушни власти не дозволиле нивниот авион да слета на америчко тло.

Избраниците на Марсело Биелса требаше од Канкун да отпатуваат за Мајами, каде што во понеделник ги очекува првиот натпревар на турнирот против Саудиска Арабија. Сепак, патувањето било блокирано откако авионот што требало да ја превезе експедицијата не ги исполнувал потребните услови за влез во Соединетите Американски Држави.

Според шпанскиот Ас, американските власти привремено не дозволиле леталото да влезе во земјата, што предизвикало вистинска трка со времето за Уругвајската фудбалска федерација и ФИФА.

Веднаш започнала потрага по алтернативно решение, а во меѓувреме репрезентацијата останала во тренинг-центарот Мајакоба во Мексико, чекајќи дозвола за патување.

Поради целата ситуација бил нарушен и официјалниот распоред на активностите. Прес-конференцијата што требало да се одржи пред натпреварот била одложена, а дел од планираните обврски морале да бидат поместени.

Според последните информации, проблемот е надминат и летот е реорганизиран, па Уругвај сепак треба навреме да пристигне во Мајами. Но, штетата веќе е направена.

Јужноамериканската селекција ќе има помалку од 24 часа за адаптација на условите во градот домаќин пред својот прв настап на Мундијалот. Тоа е далеку од идеално сценарио за репрезентација која има високи амбиции на турнирот.

Многумина сметаат дека ваквиот неочекуван проблем може да влијае врз подготовката на тимот, особено кога станува збор за првиот натпревар, кој често е еден од најважните во групната фаза.

Уругвај се наоѓа во групата Х заедно со Саудиска Арабија, Зеленортските Острови и Шпанија. Првиот меч е против Саудијците во Мајами, по што следуваат дуелите со Зеленортските Острови и Шпанија.

Иако се очекува репрезентацијата навреме да се појави на теренот, целата ситуација уште еднаш покажа дека дури и најголемите фудбалски сили не се имуни на административни проблеми кои можат сериозно да ги нарушат плановите непосредно пред почетокот на Светско првенство.