ТРАМП МАКЕДОНСКИ: МАКЕДОНИЈА МЕСТО ДАНСКА НА СВЕТСКО?

Актуелните политички случувања на глобално ниво би можеле индиректно да ѝ одат во прилог на македонската фудбалска репрезентација во борбата за пласман на Светското првенство, кое ова лето ќе се одржи во САД, Мексико и Канада.

Според италијанскиот весник Газета дело спорт, во европските фудбалски кругови сè погласно се зборува за можен бојкот на Мундијалот, како реакција на политиките што ги спроведува американскиот претседател Доналд Трамп и затегнатите односи со неколку европски земји.

Клучниот момент за Македонија е тоа што иницијативата за евентуален протест доаѓа од Данска, репрезентација која треба да ѝ биде противник на нашата селекција во полуфиналниот бараж за пласман на Светското првенство.

Причината за реакцијата на Данците е политичка: барањето на Трамп за Гренланд, кој се наоѓа под данска управа, да биде анектиран од страна на Соединетите Американски Држави. Овој потег предизвика силно незадоволство во Данска, а според пишувањата, не е исклучена ниту можноста нивната репрезентација да се повлече од натпреварувањето.

Доколку тоа сценарио навистина се реализира, Македонија автоматски би обезбедила пласман во финалето на баражот, каде што би се соочила со победникот од дуелот меѓу Република Ирска и Чешка.

Иако ваквиот развој на настаните засега е само во доменот на шпекулациите, јасно е дека политиката повторно се вмешува во спортот. За Македонија, тоа би можело да значи неочекувана шанса во борбата за историски настап на Светското првенство.