БОЛОЊА СЕГА ГО ИМА „ПОСЛЕДНИОТ ИТАЛИЈАНСКИ МОХИКАНЕЦ“ КОЈ ИГРАЛ НА МУНДИЈАЛ

Ветеранот Матео Дармијан сега ќе го нарекуваат и „спасител“. Болоња му направи услуга за италијанскиот фудбал со ангажманот на поранешниот дефанзивец на Интер, кој го напушти миланскиот клуб на речиси 37-годишна возраст, по шест години поминати во неговите редови.

„Рособлу“ не само што добија сигурен дефанзивец, туку ја продолжија и традицијата Серија А да има барем еден активен фудбалер од италијанската репрезентација што настапи на последниот мундијал во 2014 година.

Минатата сезона во италијанското првенство сè уште беа Чиро Имобиле и Матија Перин. Но, сега ниту еден од нив не е дел од Серија А. Имобиле ја заврши кариерата, додека поранешниот голман на Јувентус се пресели во Палермо, кој настапува во Серија Б.

Така, Дармијан останува последниот „преживеан“ од италијанската експедиција во Бразил пред 12 години. На натпреварот против Уругвај, одигран на 24 јуни 2014 година во Натал, тој беше стартер во тимот на „аѕурите“. Сите останати веќе се во пензија или не се дел од елитното италијанско друштво.