ИРАН СТИГНА ВО САД, НО ТЕНЗИИТЕ НЕ СТИВНУВААТ

Светското првенство уште не е почнато како што треба, а иранската репрезентација веќе се соочува со сериозни предизвици надвор од теренот. Наместо вообичаената еуфорија што ја носи најголемиот фудбалски турнир, атмосферата околу Иран е обележана со политички тензии, безбедносни прашања и неизвесност.

Иран денес пристигнува во Лос Анџелес, каде што ќе го одигра првиот натпревар на Светското првенство против Нов Зеланд. Но, за разлика од повеќето селекции кои се фокусирани исклучиво на фудбалот, Иранците се најдоа во центарот на внимание поради случувањата на Блискиот Исток и односите меѓу Иран, Израел и САД.

Дополнителни проблеми се појавија уште пред пристигнувањето во Соединетите Американски Држави. Дел од членовите на стручниот штаб не добиле визи, поради што репрезентацијата морала во последен момент да го промени планот за подготовките. Наместо во Аризона, базниот камп бил поставен во мексиканскиот град Тихуана, од каде што тимот допатува во Калифорнија.

Ситуацијата дополнително ја усложнува и фактот што во Лос Анџелес живее една од најголемите ирански дијаспори во светот. Додека дел од заедницата ја поддржува репрезентацијата, други ја гледаат како симбол на актуелната власт во Техеран. Поради тоа веќе се најавени протести пред натпреварот против Нов Зеланд.

Организаторите стравуваат од можни инциденти и дополнителни тензии на трибините. Постојат најави дека дел од демонстрантите ќе носат знамиња од периодот пред Исламската револуција, што веќе предизвика реакции од иранските власти.

Претседателот на Иранската фудбалска федерација, Мехди Таџ, побара од ФИФА на стадионите да биде дозволено само официјалното државно знаме на Иран. Во меѓувреме, иранскиот министер за спорт предупреди дека ќе се реагира на секој симбол или порака што би можела да биде протолкувана како непријателска кон државата.

Во вакви околности, не е изненадување што дел од иранските фудбалери признаваат дека не ја чувствуваат вообичаената атмосфера која треба да го придружува едно Светско првенство. Наместо празник на фудбалот, околу нив има многу напнатост и неизвесност.

Сепак, на теренот Иран има големи амбиции. Репрезентацијата се наоѓа на 20. место на ФИФА ранг-листата и многумина сметаат дека никогаш досега немала подобра шанса да ја мине групната фаза на Светско првенство. Во групата се уште Белгија, Египет и Нов Зеланд, а проширениот формат со 48 репрезентации дополнително ги зголемува шансите за пласман во нокаут-фазата.

Главен адут на Иран ќе биде напаѓачот Мехди Тареми, кој беше еден од најдобрите играчи на репрезентацијата и на претходниот Мундијал.

Но пред да размислуваат за Белгија и Египет, Иранците прво ќе мора да се справат со притисокот што ги следи уште од самиот почеток на турнирот. Наместо мирна подготовка за најважниот фудбалски настан, тие во Лос Анџелес пристигнуваат во атмосфера во која политиката и фудбалот повторно се испреплетуваат.